Moving to www.karthiteach.com

Friday, July 17, 2015

ஆங்கிலம் நம் எதிரி அல்ல


"நாம் தமிழர்கள் .. ஆங்கிலம் நமக்குத் தேவையில்லை", என்று நம்மில் பலர் கூறுவதைக் கேட்டதுண்டு. இதைக் கேட்கும்போது எனக்கு சிரிப்பு வரவில்லை. சொல்பவர்களின் அறியாமையை எண்ணிக் கவலை கொள்கின்றேன். ஆங்கிலேயர் நம்மை அடிமைப் படுத்தியது உண்மை. அதை நான் மறுக்கவில்லை. அதோடு, ஆங்கிலம் தமிழை அழித்துவிடுமோ என்ற அச்ச உணர்வு நம்மில் தோன்றுவது இயற்கையான ஒன்றே. அதையும் நான் மறுக்கவில்லை. ஆனால் அதற்காக ஆங்கில மொழியயே மொத்தமாகப் புறக்கணிப்பது நிச்சயம் தவறாகும். அது இக்காலகட்டத்திற்குப் பொருந்தாத செயலாகும். ஆங்கிலத்தை ஏற்றும் தமிழை நம்மால் பாதுகாக்க முடியும். ஆங்கிலத்தை படிக்காமலே தமிழை காப்பது மிகச்சுலபம். ஆனால், ஆங்கிலம் நன்று கற்றபின்பும் தமிழை மறக்காமல் காப்பதே கடினமான செயல். நீங்கள் உண்மையும் தமிழ்ப் பற்று கொண்டவர் என்றல் இதை முயன்று வெற்றி காணுங்கள். பின்பு இந்த உலகம் உங்களைப் போற்றும்.

உலகப் புகழ் பெற்ற நம் கவிஞர் பாரதியார் ஷெல்லியின் கவிதைகளில் மிகுந்த ஆர்வம் கொண்டவர். அவர் தமிழ் மற்றும் ஆங்கிலம் ஆகிய இரு மொழிகளின் இலகணங்களையும், படைப்புக்களையும் பற்றி நன்கு கற்று உணர்ந்தவர். அவர் தமிழ் மீது கொண்ட பற்று பற்றி நம் அனைவருக்கும் தெரியும். அதற்காக அவர் ஆங்கிலத்தை வெறுத்துவிடவில்லை என்பதை நாம் நினைவில் கொள்ள வேண்டும்.

இக்கால கட்டத்தில் படிக்கும் மாணவர்களுக்கு ஆங்கில அறிவு இன்றியமையாததாக ஆகிவிட்டது. உலகப் புகழ்பெற்ற எழுத்தாளர்கள் தம் படைப்புக்களை ஆங்கிலத்திலேயே படைக்கின்றனர். அவற்றை மாணவர்கள் கற்க வேண்டுமென்றால் ஆங்கில அறிவு நிச்சயம் தேவை. அத்துடன் இன்று வேலைவாய்ப்பிற்கு ஆங்கிலம் மிக அவசியமான ஒன்று. அங்கிலம்  என்பது இன்றைய காலத்திற்கு தேவையான ஒன்றாகிவிட்டது. அதை எதிரியாகப் பாராமல், உலகில் உள்ள மற்ற மொழிகளைப் போல அதையும் ஒரு மொழியாக நாம் பார்க்க வேண்டும். நாளை நமக்கு ஜெர்மன் மொழி கற்க வேண்டிய நிர்பந்தம் ஏற்பட்டால் அதைக் கற்பதில் தவறில்லை. ஆனால் எம்மொழியக் கற்றாலும் நம் தமிழ் மொழியின் பழமையும் பெருமையும் என்றும் மாறப்போவதில்லை. அதைப் போற்றிக் காக்க வேண்டியது நம் அனைவரது கடமை ஆகும். நம் குழந்தைகளுக்கு வகுப்பறையில் ஆங்கிலம் கற்றுத் தந்தால் நீங்கள் வீட்டறையில் தமிழ் கற்றுக் கொடுங்கள். பள்ளிகளைக் குறைகூறிக கொண்டிருப்பதால் எப்ப்ரயோஜனமும் இல்லை என்பதை உணருங்கள்.

உங்கள் இல்லங்களில் தமிழ் மற்றும் ஆங்கிலம் என இரு நாழிதழ்களையும் படிக்கும் பழக்கத்தை ஏற்படுத்துங்கள். என் வீட்டில் தினம் 'The Hindu' தமிழிலும் ஆங்கிலத்திலும் வாங்குகிறேன். மாதம் நம் மொழி அறிவையும், பொது அறிவையும் வளர்க்க முந்நூறு ருபாய் செலவு செய்வதில் தவறில்லை என்று நீங்கள் நிச்சயம் ஒப்புக்கொள்வீர்கள் என்ற நம்பிக்கை எனக்கு உண்டு!!!
Post a Comment